पोखरा क्षेत्रीय अन्तर्राष्ट्रिय विमानस्थल यान्त्रिक उडान परीक्षण (क्यालिब्रेसन फ्लाइट) का लागि एरो थाइ कम्पनीको जहाज शनिबार पोखरा आइपुगेको छ । पोखरा विमानस्थलमा राखिएको जहाजले सोमबारदेखि १२ गतेसम्म परीक्षण उडान गर्नेछ ।
उक्त यान्त्रिक विमानले बिहान १० बजेदेखि १ बजेसम्म र दिउँसो साढे २ बजेदेखि साढे ५ बजेसम्म क्यालिब्रेसन फ्लाइट गर्ने पोखरा क्षेत्रीय अन्तर्राष्ट्रिय विमानस्थलका प्रवक्ता अनुप जोशीले जानकारी दिए ।
क्यालिब्रेसनका लागि पोखरा अन्तर्राष्ट्रिय विमानस्थल आयोजनाले सरसफाइ अन्य यन्त्र परीक्षण गर्ने काम गरिरहेको छ । पोखरा महानगरपालिका–१४ छिनेडाँडामा निर्माणाधीन विमानस्थलको हाल ९८.५ प्रतिशत भौतिक प्रगति सकिइसकेको आयोजना प्रमुख विनेश मुनकर्मीले जानकारी दिए । ‘बाँकी काम क्यालिब्रेसन पछि डिसेम्बरसम्म सक्ने गरी अघि बढेका छौं’ उनले भने ।
२०२१ जुन १० मा सक्नुपर्ने सम्झौतामा उल्लेख भएपनि तोकिएको समयमा काम पूरा नभएपछि एक वर्ष म्याद थपिएको थियो ।
