प्रहरी प्रतिको घट्दो जनविश्वासका सम्बन्धमा मेयर जिसिको चिन्ता, प्रहरी प्रमुखलाई भने, विश्वासको स्खलनका विषयमा खोजि गर्नुहोस्

मस्तिष्कघातका कारण बिरामी भई लामो समयदेखी उपचारमा रहेका पोखरा महानगरपालिकाका प्रमुख मान बहादुर जिसी शुक्रबार एक सार्वजनिक कार्यक्रममा देखिएका छन् । उनलाई श्रावण १ गते शुक्रबार अचानक मस्तिष्कघात भएको थियो । त्यसपछि उनि कुनैपनि सार्वजनिक कार्यक्रममा देखिएका थिएनन् ।
शुक्रबार जिल्ला प्रहरी कार्यालय कास्की परिसरमा निर्मित नयाँ भवनको उद्धघाटन कार्यक्रममा उनि भौतिक रुप मै सहभागी भए । उनको स्वास्थ्य अवस्था क्रमिक सुधारको क्रम मै छ । कोरोना महामारीका बिच आयोजित कार्यक्रममा सहभागी मेयर जिसिले प्रहरी प्रतिको जनविश्वासमा स्खलन आएको तर्फ संकेत गर्दै यसको गम्भिर समिक्षा गर्न प्रहरी प्रमुखलाई आग्रह गरे ।
उनले भने, “जुन प्रहरी प्रति जनविश्वास छ, अव मलाई भन्नुहुन्छ भने त, म पञ्चायतकालको विद्यार्थी भएका कारणले पनि होला, प्रहरीको जस्तो कपडा लगाएर सामान्य नागरिक आउँदा पनि प्रहरी आयो भनेर भाग्थ्यौँ हामी । त्यो अहिले किन हराइरहेछ, किन त्यो ह्रास भैरहेको छ भन्ने कुराको खोजि गर्न प्रहरी प्रमुखलाई आग्रह गर्दछु ।”
भौतिक निर्माण मात्र प्रगति नभएको उल्लेख गरेका मेयर जिसिले सेवाको गुणस्तर र जनविश्वासको मर्यादामा ख्याल गर्न प्रहरी प्रशासनलाई स्मरण पनि गराए ।